بوردان بیر آتلی کئچدی
آتین اویناتدی کئچدی
گون کیمی ایشیق ساچدی
آی کیمی باتدی کئچدی
هلهده بو آجی خبری اینانانمیریق . اوندان تکجه قوجامان تبریزیمیزین فخر ائدیلمهلی تاریخینی یوخ ، ستارخان ،باغیرخان و بوتون میلی قهرمانلاریمیزین قوخوسونو دئییل ،اوندان تکجه نیسگیللی قاراباغ دردینی ده یوخ ،بوس بوتون قارانلیقلاردا ساخلانیلمیش تاریخیمیزین دادینی تامسیدیق نه یازیق کی اونو چوخ تئز ایتیردیک و دنیزدن یالنیز داملالار قازانا بیلدیک.
چاغداش تاریخیمیزین آتاسی اولان جناب دوکتور سرداری نیانین ائلیمیزه پای وئردیگی، اونلار کیتاب و یوزلر مقاله هر بیریسی اؤز یئرینده شاه اثر اولسادا ،اونون ان بؤیوک شاه اثری حیاتی ایدی . او ایللر بویو بوتون شخصی منفعتلره گؤز یوموب ، یاشامین ائلینه وقف ائتدی.
اوستاد بو گون، گنج ،اورتا یاشلی و یاشلیلاریمیزین آراسیندان ان سئویلن شخصیتلریندندیرسه تکجه اونون یوکسک علمی خیدمت لریندن یوخ ،بلکه حیاتی بویونجا ، اینسانی فضیلتلری یوکسک سویهده داشیدیغینا گؤرهدیر.
دوکتور سردارینیا هئچ زامان اؤلمهیهجک اونون ائوی میلیونلار آذربایجانلینین اورگینده دیر و اکدیگی توخوملار بارا اوتورماقدادیر.
آرمان تشکولو بو آغیر ایتگینی سردارینیا عاییلهسی باشدا اولماقلا ،بوتون میلتیمیزه باش ساغلیغی دئییب،جان دوستوموز آیدین سردارینیادان، آتاسینین آغیر خسته اولدوغو گونلرده چکدیگی بوتون زحمتلرینه گؤره الیندن اؤپوب ،گلهجکده آتاسینین میراثداری کیمی اغیر یوکو داشیماقدا باشاریلی اولدوغونا اینانیریق.
هیچ نظری موجود نیست:
ارسال یک نظر