آزاد تبریز- چاغداش تاریخیمیزی بیلمک، اوزه للیکله مشروطیت دونمی گرچکلرینی گورمک و تبریز شهرینین اونمینی آنلاماق اوچون رحمتلیک صمد سرداری نیا جنابلارینین کیتابلارینی اوخوماق گره کیر. 1377 ایلده، زینب پاشا حققینده بیر آراشدیرما اوچون قایناق آختاریرکن، یولداشلار صمد سرداری نیا جنابلارینی توصیه ائتدیلر. اوستاد ایله ایلک گوروشمم تهران دا امیر کبیر بیلیم یوردوندا کی ستارخان قورولتاییندا اولدو. اوستادا بئله بیر آراشدیرمام اولدوغونو دئدییم زامان ماراقلا قارشیلادی و سالوندا اوتورورکن، قیسا دا اولسا منی راهنمایی ائله مه یه چالیشدی. اوستادین دئدیکلری قایناقلاردان فایدالاناراق زینب پاشا حققینده بیر یازی یازدیم.
داها سونرالار یئنه 1333-57 آراسینداکی میللی حرکتین دورومو موضولو بیر آراشدیرما اوچون، اوستادی توصیه ائتدیلر. او دونملرده میللی دویغونون سول حرکتلر ایجریسینده نئجه یئر آلدیغی باره ده اوستادین زیارتینه گئتدیم. ائوی تبریزین قدیم کوچه لریننی بیرینده، ائله کلاسیک بیر تبریز ائوینه بنزه ییردی. ائوینی تعمیر ائتمک اوچون، بنا و ایشچیلر وار ایدی. اوستاد ایشینین چوخ اولماسینا باخمایاراق، منی گولر اوز ایله قارشیلاییب، اوتورما اوتاغینا دعوت ائتدی. یاخلاشیق ایکی ساعات او دونملرده ن، مناف فلکی، اوختای و صمد بهرنگی حققینده خاطره لر آنلاتاراق منیم اوچون ده یرلی بیلگی لر وئردی. هله ده او گوروشمه دکی یازدیغیم نوتلار قالیرلار. داها سونرا، نهضت تنباکو آدلی کیتابینی امضالایاراق منه هدیه ائتدی. او گون 19 یاشیمدا ایلک امضالی کیتابیمی آلمیشدیم. داها سونرالار بیر چوخ امضالی کیتاب آلسام دا، او کیتابین دادی باشقادیر.
ده یرلی تاریخچیمیز، اوستاد صمد سرداری نیا نین وفاتی، هامیمیزی دریندن اوزموشدور. بیلیرم کی او بیزی ترک ائتسه ده، کیتابلاری هر زامان تاریخیمیزی و گلجییمیزی آیدینلاتاجاقدیر. عاییله سینه و یاخینلارینا باش ساغلیغی دیلکلریمی ایله تیرم.
هیچ نظری موجود نیست:
ارسال یک نظر