آزاد تبریز- بو یازی 1385ده مهر آی نین بیری موناسبتی ایله قلمه آلینمیشدیر.
70-اینجی ایللرده ن بری گونئی آذربایجان انیورسیته لرینده باشلانان میللی موباریزه نین بو گونکو دوروما چاتماسینی کیمسه گوزله یه بیلمزدی. 100- 150 اویرنجی نین آنادیللری دوغرولتوسوندا باشلادیغی موباریزه 15 ایل سوره ایچینده میللتیمزین ایچینه داشدی و میلیونلار اینسانی آیاقلاندیراراق کوچه لر توکدو. ایران حوکمتی گنج لریمیزه اینانیلماز درجه ده باسقی لار دوزنله دی، آما گنجلیگمیز یورولمادان موباریزه سینه دوام ائتدیردی. قاپالی و دیکتاتوریا باسقی سی آلتیندا یاشامیش و مینلر شهید وئره ن گنجلیگمیز ساواش (ایران – عراق ساواشی) دونمی ایللرینده ن سونرا یئنه اوزونو توپارلاییب و بو دفعه یئنی بیر آنلایشلا یئنی بیر فورمدا یئنی بیر موباریزه یه باشلادی. بو موباریزه تام فرقلی بیر موباریزه ایدی. بیر یاندان آنا دیلین، بیر یاندان آنا وطنین و بیر یاندان اوز مقدراتینی اله کئچیرمک آرزوسو ایلا مئیدانا چیخان بو موباریزه اوزو اوزونو ائیتمه یه باشلادی. زامان-زامان ییخیلدی و سونرا آیاغا قالخیب یولونا دوام ائتدی.
هر جور تحقیره آلیشان میلتیمیزی کوچه لر توکمه گی باشاران گنجلیگمیز بو گونده آنا دیلینی زنجیرلرده ن خیلاص ائتمک آماجی ایلا آیاغا قالخمیش و میللتیمیزی یاردیما چاغیریر. گنجلیگیمیز ایلک باشدان یولونون حاق یولو اولدوغونا اینانیردی و ائله اونا گوره هئچ زامان یورولمادی و گله جه یه اولان اومیدی هرکسین اوره گینده یاشاتدی. ایندی بیر داها اونجه کی ایللرده ن داها جدی اولاراق آنا دیلی اوغروندا موباریزه سینی گئنیش مقیاسدا اون پلانا چیخاردیر. ایللر ده ن بری دینج و مدنی ایستک لرینی طومارلار قالیبنده حوکومته سونان گنجلیگیمیز جاواب آلمادیقدان سونرا داها سرت بیر آدیملار آتماغا باشلامیشدیر. بو سفر درس کیلاسلاریندا حاضیر اولماییب و مدنی اعتراض لاری دوشونمه یه باشلامیشدیر. گنجلیگمیز اینانیر کی یئنه ده سونوندا حاق غالیب گله جک. ایران حوکمتی هئچ بیر اولوسلار آراسی آنلاشمالارا اویماق فیکرینده دئییل. بیزی بویله بیر ذلتلی یاشاماقدان قورتاران اوزوموزه و میللتیمیزه و گله جه یه اولان اینانجیمیز اولاجاق. میلتیمیز هله ده بیلینچلشمه پروسه سینه دوام ائتمه لی دیر. گونده ن گونه اوزوموزه و یولوموزا ایناناراق، اکسیکلیک لریمیزی تانییب چوزوم آرایشیندا اولمالی ییق. بو گونلر نه گوزه ل کی اینترنت صحیفه لریمیزده لیدرلیک آرزوسوندا اولمایان آیدین گنجلیگیمیز میلی موباریزه استراتژی لرینی آراییر و زامانی گلنده ده اویاریلار وئریر. گنج آیدین یازار توپلومو دوشونجه سیینده اولان گنجلیگمیز و اوزه للیکله اویرنجی لریمیز دردین تام مرکزینه بارماق قویموشدور. گنجلیگمیز هئچده اوزون اوزون یوللاری بیر گئجه ده گئتمه گی دوشونمور. تام عکسینه گله جه یه ایناناراق دوشونه دوشونه آدیملاییر. بو گون اساس قونو مهر آیی نین بیرینده اولان اعتراضلاریمیز اولمالی دیر. بوتون الی قلمه گئده ن یازارلاریمیزا سسله نه ره ک میللتیمیزه اوزلرین توتوب چاغریشدا اولمالاری ایسته نیلمکده دیر.
سون اولاراق میللتیمیزه اومود وئریب، اونلاری گله جک اوچون سفربر ائتمک آماجی ایله، اویرنجی گنجلیگمیزه اینانلارا اوز توتاراق هر زامان اللرینده گله جک بیزیمدیر شوعارلارینی توتمالارینی رجا ائدیره م. ملتیمیز توتدوغو اوزون و سارسیدیجی موباریزه یولوندا گله جه یه اینانا بیلمزسه موبارزه گوجونو الده ن وئریب و صبر کاساسی تئز دولا بیلر. بیز یولوموزون هله ایلک آشمالارینداییق. گله جه یه ایناناق و میللتیمیزی ایناندیراق. خوشبخت و آزاد یاشام میللتیمیزین یولونو گوزله ییر.
گله جک بیزیمدیر
احسان تبریزلی
هیچ نظری موجود نیست:
ارسال یک نظر