واحید قاراباغلی
vahidqarabagli@gmail.com
ماحمود احمدی نژادین ۱۳۸۴ اینجی ایلدن ایران جمهور باشقان لیغینا سئچیلدییندن و ۱۳۸۵ اینجی ایلده آذربایجان خرداد اعتراض لارینین باش وئرمه سیندن سونرا گونئی آذربایجان دا اینسان حاقلاری نین تاپدالانماسینا میللی فعاللاری نین توتولما حاللاری نین - چوخالماسی - اونلارا تعضیقلرین آرتماسینا شاهید اولموشوق.
بو گون آذربایجانلی مدنی - سیاسی - اینسان حاقلاری فعاللاری- ژورنالیست لر - اویرنجی لر اوز میللی و مدنی ایستک لری یولوندا حبسه گئدیرلر- تحصیل دن و یا ایشلریندن آتیلیرلار. بئله بیر دورومدا اینسان حاقلاری مساله سینه دیققت یئتیرمک بو گون بوتون آذربایجانلی فعاللارین اوزللیکله خاریجده یاشایان سویداشلاریمیزین اوزه رینه دوشن بیر وظیفه دیر. اونلار ایچه ریده کی آذربایجانلی لار لا بیرلیکده اوز گئنیش فعالیت لری ایله بین الخالق تشکیلاتلارین دیققتینی آذربایجان مساله سینه گتیرمه لیدیرلر.
گونئی آذربایجاندا حبس ائدیلن سیاسی فعاللارین ایشگنجه یه معروض قالدیغی - اونلارا قارشی ساختا ایتتهام لارین ایره لی سورولدویو و آی لار حبس لر وئریلمه سی باره ده معلوماتلار بیر بیری نین آردینجا گلیر.
بو معلوماتلار البته کی کامیل دئییل دیر چونکو خبرلر اساسا” فعاللارین عایله سیندن، دوستلاریندان، حرکات عضولریندن الده ائدیلیرو عایله لرله تماس یاراتماق همیشه ده مومکون اولمور و یا عایله لر تهدید آلتیندا ساخلاندیغیندان حبس ائدیلن عضو لری باره ده معلومات وئرمه مک له خبردارلیق ائدیلیرلر. تصور ائدون کی، حبس ائدیلن، ایزله نن، نظرده ساخلانیلان، ضمانت له آزادلیغا بوراخیلان حرکات چی لارین ائولری لری ده نظارته آلینیر و گودولور، تلفون لاری دینله نیلیر، اونلار باره ده هر هانسی معلوماتلاری یاییلماماسی اوچون یاخین دوستلاری بئله نظارت گوتورلور .دیگر عایله عضولری، قارداشلاری،حیات یولداشلاری دا حبس ائدیلیر. دئمک ایران دولتی گونئی آذربایجان میللی حرکتی نین ماهیتی نین آچیقلانماسیندان قورخور، معلوماتلارین خاریجده و خالق آراسیندا چیخاریلماسی نین قارشی سینی آلماغا چالیشیر.
آمما بو چتین لیک لرله عایله لر، فعاللار جانلارینی خطره سالاراق، بو یولدا هزینه لر وئره رک خبرلری اینسان حاقلاری فعاللارینا چاتدیرییرلار و البته کی آذربایجانلی اینسان حاقلاری فعاللاری محدود ایمکانلارینا باخمایاراق بو معلوماتلاری بین الخالق تشکیلاتلارا و مدیالارا چیخارتماق دا سعی گوسته رییرلر. آمما هله ده دونیا یئته رینجه بو باره ده معلوماتلی دئییل بونون سببی ایسه خاریجده یاشایان آذربایجانلی لارین دوزگون فعالیت لر یئرینه، انرژی لرینی منفی حرکتلره، داخیلی چکیشمه لره، تشکیلاتلار و شخصلر آراسیندا اختلاف لارا صرف ائتمه سی و ایش یئرینه تکجه اوتوروب دوشدویوموز گونه مرثیه لر اوخوماق دان علاقه دار دیر. بونا باخمایاراق کی بیزیم بو گون تکجه فارس شوونیستینه لعنت اوخوماقلا مسئله لریمیز حل اولونمایاجاق . ایچه ریده فعاللار مبارزه یولوندا مختلیف تعضیقلر له اوزله شدیگی زامان بیز نه لرله مشغولیق بو خاریجی اولکه لرده کی فعالیتیمیزه هئچ بیر قاداغا یوخدور. گوز آلتیندا دئییلیک . ایشگنجه اولونموروق و حبس وئریلمیر.
بو گون خاریجده یاشایان و دوزگون فعالیت گوسترن لر بارماق ساییندان آزدیلار. تاسف لرله تا او زامانا قده ر کی بیزیم خاریجده یاشایان سویداشلاریمیز تکرار دانیشیق سوزلرین بوراخماییب و عملی فعالیته کئچمه یه جک لر هر نه بیزیم ایسته دییمیز کیمی اولمایاجاق. بو گون مساله لریمیزی خاریجی مدیالارا چیخاریلماسینا بویوک احتیاج واردیر. اگر بیز بو گون بونو ائده بیلمه سک، ایران حاکیمیتی داها آزغینلاشاجاق، فعاللاریمیزی آرتیق اینجیدیب و میللی حرکاتیمیزی سرکوب ائده جک دیر. بونا ایمکان وئرمه مک اوچون هامیمیز چالیشمالییق.آذربایجان تشکیلاتلاری بین الخالق استانداردلارلا قورولوب و سیستئملی فعالیت گوسته رمه لیدیرلر.ایش قانونلارینی رعایت ائدیب و لایحه نین وئره جگی نتیجه نی دوشونه رک آددیم آتمالیدیرلار.
خاریجده یاشایان سویداشلاریمیز اینسان حاقلاری تشکیلاتلاری ایله داها چوخ علاقه یاراتمالیدیرلار. همین تشکیلاتلار واسیطه سی ایله حقیقت لریمیزی دونیا ایجتیماعاتینا چاتدیرماق ، بعضی تدبیرلری حیاتا کئچیرمک مومکوندور. دیاسپورا تشکیلاتلاری گونئی آذربایجانلا باغلی آیری - آیری بین الخالق تشکیلاتلارا، آوروپا اولکه لرینده پارلمانت قوروملاری ایله سیخ علاقه یاراتمالی، بو ایستیقامت ده فعالیت گوسترمه لیدیرلر.
گونئی آذربایجان میللی حرکاتی نین تملی اینسانی ایستک لره، دونیادا قبول ائدیلمیش اینسان حاقلاری قانونلارینا، وطنداش آزادلیغی و مدنی حاقلارین برابر قورونماسی اصوللارینا سویکه نیر.
ایراندا سیاسی فعاللاریمیزین حقوقولارینین پوزولماسی نین اوزه چیخارتیلماسی ایله یاناشی اینسان حاقلاری نین گئنیش بیر آنلاملی اولدوغونو دا نظره آلاراق ایقتیصادی - سیاسی - ایجتیماعی - کولتوره ل حاقلارینی دا مطرح ائتمگه بویوک ایمکانلار وار. بو اوزللیک لری میللی حرکتیمیزده یایماق گونوموزون ان واجیب مساله لریندن دیر. تجروبه گوسته ریب کی بئله فعالیت لر هر زامان اوغور الده ائدیب چونکو موعاصیر دونیا دموکراسی و اینسان حاقلارینی بسله ییر.
بو گون میللت لر وارکی سای باخیمیندان چوخ آزدا اولسالاردا بویوک لابی چی لیک گوجونه مالیک دیرلر. و بیزده بیر میللت اولاراق اوزوموزه بونو هدف قویاراق کی ایچه ریده گئدن حرکاتی خاریجده تانیتدیراق بو یولدا سیستم لی فعالیت میزله بین الخالق جمعیتین دیققتینی و حیمایه سینی حرکتمیزه جلب ائتمه لیک، بلکه بو ایش بیر گون ده یا بیر آی دا اولمایا آمما زامانلا بیزده او یئره چاتا بیله ریک. بو شرط له کی هدف یاددان چیخمایا و توتدیغیمزی یولدا ، دوزگون اصوللارلا فعالیت گوستره ک.
www.vahidqarabagli.blogfa.com
www.savalansesi.com
هیچ نظری موجود نیست:
ارسال یک نظر