آزاد تبریز- عزیز دوستلار، آلدیغیم قارا خبره گؤره دوکتور صمد سرداری نیا وفات ائدیب.
وارلیق ین تمل داشلاری و قوروجولاریندان اولان و اوتوز ایل دن بری تاریخی مقاله لریمیزی و تبریزده وارلیق ین یاییمینی عهده سینه آلیب اونون نماینده سی وظیفه سینی گؤرن عزیز دولت و همکاریمیز وقت سیز وفات ائدیب و عائله سیله برابر دوستلارینی و وارلیق توپلوسونو ماتمه بویوروب و یالقیز بوراخیبدیر.
دوکتور سرداری نیا هم تاریخی، هم ده حقوقچو ایدی و اوتوز ایلدن بری بیر عالیم آراشدیریجی و یازیچی کیمی وارلیق دا تاریخی مقاله لری یازاردی و آذربایجانین قارانلیق دا قالان و حقیقت خلقیمیزین و یوردوموزون فخری اولان تاریخی شخصیتلریمیزی گون ایشیغینا چیخاردیب خلقیمیزه تانیش ائدیردی. اونون وارلیق دا یازدیغی مقاله لریندن باشقا تالیف ائتدیگی کتابلاری دا خصوصاً 20 – نجی عصر تاریخی میزی آیدینلاتماق باخیمیندان عوض سیز اثرلردیر.
او همیشه وارلیق لا تمنا سیز و عوض سیز همکارلیق ائله ییب وارلیق ین ان صمیمی و صداقتلی همکارلاریندان ایدی.
وارلیق درگیسی و توپلوسو بئله بیر همکاری و فعال نماینده سینی الدن وئرمکله بؤیوک و عوض ائدیلمز بیر ایتگیه اوغرامیشدیر. اونون یئری وارلیق دا و وارلیق توپلوسوندا همیشه بوش قالاجاق و عزیز خاطره سی هئچ بیر زامان اونودولمایاجاقدیر.
سرداری نیانین اؤنملی بیر وظیفه سی ده وارلیق ین نماینده سی کیمی تبریز ده وارلیغی یایماق و اونون حقوقنو قوروماق ایدی. او تمناسیز فقط چوخ جدی شکلیده بو ایشی اوزون ایللر یئرینه یئتیرمیشدیر و قانیندان اول خسته لندیگی گونلر بو وظیفه نی خلف اوغلو آیدینا تاپشیرمیشدیر. بودا اونون آنادیلی و مدنیتینه نه قدر باغلی اولدوغونو گؤستریر. دوکتور سرداری نیا نین شخصی حیاتی دا، اجتماعی و مدنی حیاتی کیمی تمیز، پاک و پارلاق دیر و یئنی یئتملریمیزه اؤرنک اولمالی دیر.
من بو آجی حادثه دن نه قدر اوزولوب تاثرلندیگیمی کلمه لرله ایضاح ائده بیلمیرم. هله وطندن اوزاقدا اولدوغوم و یاس مراسم لرینده اشتراک ائده بیلمه دیگیم ده منیم غم – غصه و کدرمی داها دا آرتریر. اولو تانری دان او عزیز همکاریمیزا رحمت، عائله و دوستلارینا، وارلیق توپلوسونا و اؤزللیکله اؤزومه دؤزوم و صبر دیله ییرم.
نور ایچینده یاتسین.وارلیق توپلوسو طرفیندن دوکتور جواد هیئت22/1/1387- عزیز دوستوم جناب حسن آقا دمیرچی ، لطفاً منیم بو یازیمی یاس مراسیمینده منیم طرفیمدن اوخویون و دوستلارا باش ساغلیغی وئرین.
هیچ نظری موجود نیست:
ارسال یک نظر